唱客語愛河情歌—接續—客家婚禮吉祥話(舉列)
客語***愛河情歌***
【望春風曲調，四縣客家話發音】
高雄愛河等阿哥 唱出好山歌
看到阿哥氣質高 心中儘快樂
二人牽手情意多 誓言愛到老
月光講我福氣好 情定在愛河
———————————————————————————————————–
客家婚禮吉祥話—資料來自長輩口述 晚輩筆記 葉老師標註音標
車隊開向新娘家 caˊdui koiˊhiong xinˊ ngiongˇ gaˊ
新娘屋家好人家 xinˊ ngiongˇ vugˋ gaˊ hoˇ nginˇ gaˊ
兩人相愛來過訂 liongˋ nginˇ xiongˊ oi loiˇ go tin
同心建立富貴家 tungˇ ximˊ gien lid fu gui gaˊ
新娘來自富貴家 xinˊ ngiongˇ loiˇ cii fu gui gaˊ
才貌雙全人人誇 coiˇ mau sungˊ qionˇ nginˇ nginˇ kuaˊ
幫夫教子又顧家 bongˊfuˊ gau ziiˋ iu gu gaˊ
夫妻永享好榮華 fuˊ qiˊ iunˋ hiongˋ hoˋ iungˇ faˇ
新郎來自好人（富貴、良善）家
xinˊ longˇ loiˇ cii hoˋnginˇ(fu gui 、liongˇ san) gaˊ
有才（財）有德人人誇 Iuˊcoiˇiuˊ dedˋnginˇ nginˇ kuaˊ
惜妻惜子又顧家 xiagˋ qiˊxiagˋziiˋiu gu gaˊ
日賺黃金一大車 ngidˋcon vongˇ gimˊidˋtai caˊ
燭火光輝照廳堂 zugˋfoˋgongˊfiˊzeu tangˊtongˇ
兩姓合婚壽年長 Iiongˋxiang hab funˊsu ngienˇcongˇ
明年一定降貴子 mangˇngienˇidˋtin giung gui ziiˋ
降介貴子秀才郎 giung ge gui ziiˋxiu coiˇ longˇ
手捧茶盤圓叮噹 suˋbungˋcaˇpanˇienˇdinˊdongˊ
茶杯放在對中央 caˇbiˊbiong di dui dungˊongˊ
新娘明年降貴子 xinˊngiongˇmangˇngienˇgiung gui ziiˋ
早降貴子秀才郎 zoˋgiung gui ziiˋxiu coiˇlongˇ
新娘捧茶到面前 xinˊngiongˇbungˋcaˇdo mien qienˇ
長命富貴子孫賢 congˇmiang fu gui ziiˋsunˊhienˇ
夫妻日日大賺錢 fuˊqiˊngidˋngidˋtai con qienˇ
代代也做大官員 toi toi ia zo tai gonˊienˇ
新郎新娘來斟酒 xinˊlongˇxinˊngiongˇloiˇziimˊzuˋ
夫賢妻善長長久 fuˊhienˇqiˊsan congˇcongˇgiuˋ
今日大家講恭喜 ginˊ ngidˋtai gaˊgongˋgiungˊhiˋ
明年愛食滿月酒 mangˇngienˇoi siid manˊngied jiuˋ
點起華燭滿堂光 diamˋhiˋfaˇzugˋmanˊtongˇgongˊ
照見一對好鴛鴦 zeu gien idˋdui hoˋienˊiongˊ
來年必定降貴子 loiˇngienˇbidˋtin giung gui ziiˋ
子孫出眾姓名香 ziiˋsunˊcudˋzung xiang miangˇhiongˊ
新郎新娘來拜堂 xin longˇ xinˊngiongˇloiˇbai tongˇ
夫妻恩愛壽年長 fuˊqiˊenˊoi su ngienˇcongˇ
祖先看著心歡喜 zuˋxienˊkon doˋximˊfonˊhiˋ
保佑子孫萬代昌 boˋiu ziiˋsunˊvan toi congˊ
公婆同心好姻緣 gungˊpoˇtungˇximˊhoˋinˊienˇ
牽手煞猛賺大錢 kienˊsuˋsadˋmangˊcon tai qienˇ
降子降孫連又連 giung ziiˋgiung sunˊlienˇ iu lienˇ
添丁發財萬萬年 tiamˊdenˊfadˋcoiˇvan van ngienˇ
新郎新娘企上台 xinˊlongˇ xinˊngiongˇkiˊsongˊtoiˇ
幸福美滿跈等來 hen fugˋmiˊmanˊtenˇdenˋloiˇ
同心牽手來結合 tungˇximˊkienˊsuˋloiˇgiedˋhab
又添新丁又發財 iu tiamˊxinˊdenˊiu fadˋcoiˇ
公婆同心好姻緣 gungˊpoˇtungˇximˊhoˋinˊienˇ
牽手煞猛賺大錢 kienˊsuˋsadˋmangˊcon tai qienˇ
降子降孫連又連 giung ziiˋgiung sunˊlienˇ iu lienˇ
添丁發財萬萬年 tiamˊdenˊfadˋcoiˇvan van ngienˇ