客家節慶的公益價值

客家節慶的公益價值

台灣个客家庄，一年到尾，有當多个節慶，十分有特色，係發展觀光个資源。客委會煞猛（努力）推動「客庄12大節慶」，這12大節慶分布在1年個12隻月，一共有16種大型个節慶活動，十分鬧熱。

這16種客家庄个節慶活動，自北到南到東部，在桃園有『龍潭歸鄉文化季』、「平鎮客家文化節」。在新竹有「竹東天穿日」、「義民節」、「花鼓藝術節」。在苗栗有「火旁（bong）  龍」、「頭份四月八客家文化節」、「三義雲火龍節」。在台中有「新丁粄節」。在南投有「國姓鄉搶成功文化祭」。在高屏六堆有「美濃字紙祭」、「尖砲城」、「六堆客家運動會」。在花蓮有「拔子庄鼓王爭霸戰」。還有全國性个「客家桐花祭」老（和）「收冬戲」。這兜活動推行已來，除了發揮觀光个效果以外，也發揮了國民教育个價值，這下崖就台灣北、中、南，舉幾个例子向大家報告：

第一：在北部方面：「竹東天穿日」發揮環保教育个價值。

竹東地區个客家諺語講：「有做沒做寮到天穿過」、「有做沒做總愛寮天穿」，故所，每年到了正月二十天穿日，竹東个鄉親會蒸甜粄，也會舉辦山歌比賽，一方面紀念「女媧補天」，一方面象徵利用甜粄个黏性來補天，分大地毋會「天穿地漏」，農民年年豐收。這下，臭氧層破壞，係真正个「天穿」，舉辦「竹東天穿日」節慶，也做得分崖兜知道保護臭氧層个重要，這係分人快樂當中最好个環保教育活動。

第二：在中部方面：「東勢新丁粄節」發揮男女平等个教育價值。

頭擺農業社會當需要男丁來添手耕種，故所，東勢鎮在每年正月十五，會舉辦新丁粄節。凡是當年有降賴仔个家庭，愛準備新丁板來答謝伯公个保護，也拿新丁粄來同大家分享快樂。毋過，這下係男女平等个時代，東勢鎮舉辦个新丁粄節，已經有男女平等个觀念，凡係有降細人仔个家庭，無論降賴仔，也係降妹仔，全部來做新丁粄來慶祝，也答謝伯公个保護。這對小學生來講，係最好、也係最快樂个男女平等教育。

第三：在南部方面：「美濃字紙祭」發揮「敬惜字紙」、「晴耕雨讀，自立自強」个教育價值。

客家諺語講：「細人毋讀書  毋當畜條豬」，六堆个客家夥房對聯寫一付對聯：「晴耕雨讀  一等人忠臣孝子  二件事耕田讀書」。客家人在注重教育个風氣之下，對「字」同「紙」十分愛惜，凡是寫過字个紙，做毋得隨便亂丟，必須收集起來，送到敬字亭統一焚燒，等到每年正月初九天公生个時節，正來舉辦「迎聖蹟  字紙祭」節慶，將字紙焚燒過後个灰，經過祭拜之後，放流到美濃河，拜託河神，將凡間「敬字惜文」个精神報告玉皇大帝，保護所有个讀書人，功成名就。因為這个活動包含恁好个教育價值，故所舉辦美濃字紙祭」已經發揮「敬惜字紙」、「晴耕雨讀，自立自強」个教育目的。

客家个節慶十分有文化意義，舉辦以來已經發揮觀光个功能同教育个價值，也做得將客家人留在客家庄，維護客家語言同文化个傳承，希望大家招大家，共下來參加客家庄个12大、16種个文化節慶活動，分客家文化流傳千年！萬年！萬萬年喔！