客語相聲—崖去考客語認證

客語相聲—崖去考客語認證

阿明牯：大家好！崖係阿明牯。

阿美妹：大家好！崖係阿美妹。

阿明牯+阿美妹：（齊聲）：上台一鞠躬，共下打招呼（此時二人手舉起向觀眾打招呼）。

阿美妹：阿明牯呀，你知道在客家庄作麼介頭路最有前途沒？

阿明牯：係毋係賣面帕粄？

阿美妹：毋係！

阿明牯：係毋係賣擂茶？

阿美妹：毋係！

阿明牯：係毋係賣紅粄？

阿美妹：毋係！

阿明牯：喔…喔…喔，到底賣麼介啦？

阿美妹：就係賣新鮮个空氣啦！

阿明牯：新鮮个空氣？有影沒？

阿美妹：當然有影。因為都市空氣差，又太熱，崖就在客家庄山肚，作一條大氣管，將新鮮个冷空氣送到都市家庭，冷氣機个生意就分崖搶來也，這個頭路當有錢途喔！

阿明牯：阿美妹講个有道理！毋過，新鮮个空氣沒啦用，還做得過日，有一種東西假使毋啦用（不夠用）就分人日仔難過喔。

阿美妹：到底係麼介東西？

阿明牯：那就係錢啦！

阿美妹：錢喔？仰會毋啦用（不夠用）？像崖，先賺小錢，再將小錢做本錢，拿來賺大錢，賺到大錢，有兜拿來有孝爺娘，有兜拿來做善事，有兜蓄起來開工廠，實在當快樂喔！

阿明牯：阿美妹當鏘喔！請問阿美妹，愛仰般先賺小錢做本錢？

阿美妹：崖教你。你去參加客語認證就可以先賺小錢做本錢。

阿明牯：參加客語認證？去考試，仰有錢好賺？崖知！崖知！係無係代人去考試，賺工錢？

阿美妹：賺錢愛對得起良心，做無淂做違法个事情！

阿明牯：沒….，到底參加客語認證仰會有錢賺，豦豦同崖講啦！

阿美妹：好啦！好啦！崖同講，崖阿爸盡惜崖，崖阿爸鼓勵崖，通過客語中高級認證賞獎學金1萬元！通過客語中級認證賞獎學金5000元！通過客語初級認證賞獎學金1000元！

阿明牯：恁好喔？假使崖99年考四縣腔，100年考海陸腔，101年考大埔腔，102年考饒平腔，103年拷昭安腔，5年崖就賺5萬元，係沒？

阿美妹：係呀！係呀！到時愛討輔娘就有聘金喔！

阿明牯：請問，阿美妹，妳嫁人介時節，聘金愛幾多？

阿美妹：阿明牯呀！你還恁小，就想討崖做輔娘唷？

阿明牯：阿美妹，妳生來恁靓，講客話恁溫柔，崖又生來恁緣逗，分崖做輔娘毋會差啦！

阿美妹：做得呀！毋過有一个條件。

阿明牯：麼介條件？

阿美妹：等你考到5種客語中高級認證介時節，正來講。

阿明牯：阿美妹，妳看崖毋起係沒？崖考毋到係沒？從今年開始，崖考分看，等崖5年後考到5種客語中高級認證介時節，妳愛做崖介輔娘喔！

阿美妹：美女講話算話！到時各位觀眾愛包太太个紅包來喔！好沒？（此時，台下觀眾高聲說好！）

阿明牯+阿美妹：（齊聲）：下台一鞠躬，正來料！