愛惜水資源環境教育—客語朗讀比賽稿

愛惜水資源—客語朗讀比賽稿

依照環境教育法實施環境教育之用

各位評判先生，各位同學，大家好！崖今分日愛朗讀个題目係「愛惜水資源」。

大家知道，客家文化佬環保有盡深个關係，「環境教育法」第19條有規定，公務人員、高中以下學生佬先生每年愛接受4點鐘个環保課程，「環境基本法」第5條也規定，國民要盡到環保个責任。故所，環保係當重要个議題，這下崖就用客家文化來介紹「愛惜水資源」。

台灣面積有3萬6千平方公里，高度1,000公尺以上个山區有百分之31.5，100公尺到1,000公尺个山坡地也有百分之31.3，100公尺以下个平地只有百分之37.2，又因為台灣个河川大部分向東流入太平洋，向西流入台灣海峽，東西向最闊正150公里，故所落雨以後，水資源大部分流入海肚，造成台灣雖然每年落水有1,030億公噸，毋過只有117億噸做得用，平均每位老百姓得到个淡水，只有世界平均个六分之一。

面對台灣缺水問題，客家先民利用當多進步个觀念來愛惜水資源、保護水資源，這下就佬大家報告：

第一、利用「省儉精神」來節省水資源。

客家諺語說：「有油莫點雙盞火，免得沒油打暗摸」，又講「爛衫好遮羞  爛鼓好救月  爛銅鑼好嚇賊」、「滴水成河  粒米成籮」、「食不窮  穿不窮  浪費一世窮」、「食水愛惜水源頭」，也全部代表省儉个精神，故所大家曉得節省水資源，毋會浪費，會將屋家洗菜个水，用來抹地泥、淋花、淋菜園，又會使用有「省水標章」个洗衫機、省水馬桶、省水个水龍頭…等等，來節省當多水資源佬水錢。

第二、利用「客家夥房」个「半月池」來開發水資源：

頭擺「客家夥房」面前大部分有「半月池」，將天公落下來个雨水，蓄起來，當像「平地水庫」，做得利用雨水來灌溉農田、蓄魚、蓄鴨、種蓮花，變成當靚个「水資源觀光景點」；「半月池」也做得作為消防用水，變到緊急使用个水源；又因為山頂落下來个水，有一部分蓄在「半月池」底肚，毋會全部流入大河霸，當像「滯洪池」个功能，故所也做得減少下游發大水个風險；還有，「半月池」就像「熱交換器」，做得吸收熱能，分熱天天時毋會恁熱。

第三、利用「埤塘」來開發水資源：

桃園係客家人口最多个縣市，因為地泥3到5公尺比較毋會漏水，故所桃園个先民為了利用雨水、河壩水，從1741年開始，就挖「埤塘」來蓄水，變成「平地水銀行」。

根據1963年个調查，桃園埤塘有8846個，1995年調查時節，剩到1450個，恁好个埤塘，在2008年得到內政部認定為國家1級溼地，巨个功能佬「半月池」共樣，做得灌溉、降低溫度、防止水災、觀光、蓄魚、蓄鴨，也做得做為「落雨時節，河川污泥沉澱池」，係目前保護水資源个好方法。

因為桃園埤塘當多，故所桃園佬埤塘有關个地名也當多，像：觀音鄉个塘頭、塘尾、塘背、新塘。中壢市个平坡、北坡。平鎮市个八角塘。新屋鄉个下北湖、中北湖。楊梅市个下四湖、上四湖、頭湖、二湖、三湖、四湖…等。龍潭个黃泥塘…等等。

第四、利用「頓水亭」來提醒大家愛惜水資源：

客家諺語講：「食水拜源頭  食米拜田頭」，這係鼓勵大家愛有感恩个心，有了感恩个心，就會自動來愛惜水資源。

為了提醒大家愛惜水資源，屏東縣內埔鄉和興村就有一座「頓水亭」，有四公尺高，一共有三層，係「坐南向北」个八角形建築。

做麼介愛起「頓水亭」呢？這係因為頭擺內埔个客家人，在清朝就時節，利用東港溪佬龍頸溪个水來灌溉禾田，內埔鄉和興村个先民認為「開圳做埤」實在辛苦，為了提醒大家愛惜水資源，同時也感謝神明保護水源充足，故所起了「頓水亭」來祭拜，「頓水亭」个對聯也寫到「頓起丹心循大道、水盈綠野護良田」，來教育後代子孫愛保護水資源，也愛有感恩个心。

又因為內埔鄉和興村个先民當愛惜水資源，故所發大水个時節，大水滿到「頓水亭」頭前，就停下來，證明「頓水亭」會保護愛惜水資源个村莊。

第五、利用「水頭伯公」信仰，來提醒大家愛惜水資源：

客家地區有當多土地公廟，客家人講个「伯公廟」就係「土地公廟」，其中有保護水資源、教育大家愛護水資源个伯公就係「水頭伯公」。故所，竹田鄉竹田村就在河壩唇建立了「水頭伯公」，竹田鄉个二崙村也在「石寒橋」唇，起了「河神伯公」。

因為大家對「河神伯公」、「水頭伯公」十分尊敬，故所平常時不敢污染水資源，也節省水資源，洗衫褲个時節，愛先向「河神伯公」報告，「借水洗衫」，初一十五也愛拜「河神伯公」希望水源充足又平安。

這下，伯公生个時節，有人就向伯公報告：「拜請福德正神、水頭伯公，弟子阿明牯開工廠盡有良心，絕對毋會將廢水污染水源，破壞農地，請福德正神、水頭伯公對崖个好心加持，分崖閃開災難，有貴人來添手，工廠年年大賺錢，弟子阿明牯拜請」。