燕仔摎蝠婆

燕仔摎蝠婆(承蒙邱鴻春老師授權本網站刊登謹此致謝)

文／邱鴻春，客語文薪傳師，桃園楊梅 伯公岡客家人（海陸腔）

七月天公實在有熱，這日較早食飽夜，就出來外背行行仔吹吹風，當自然就行到隔壁鄰舍个田這位來，因為這位較闊野，定著會較涼。

這時已經無日頭，風吹來確實嶄蠻仔涼爽，毋過天頂還吂正經暗，有看著當多燕仔，在該飛上飛下討食鬧熱煎煎，下把仔會飛到店亭下來，下把仔又會飛到電線頂去，嘰嘰嘎嘎像在該講話樣，實在就還生趣。

緊看緊想，這兜燕仔恁多又飛到恁遽，當愁毋知會相撞仔無？突然間發現著，天頂較高該位，飛行个方式還過身胚个比例，看起來無像係燕仔樣，就認真看較真兜仔，哦~~~，原來係蝠婆啦，堵好這臨暗仔時間，蝠婆也開始出來討食咧，燕仔乜趕在暗昏前遽遽食飽來，正會有這站仔个重疊時間，天暗忒以後，燕仔就會在電線頂，企歸排共下歇睏，無斯斷真會相撞仔咧！就像天光雞啼、火烏蛤蟆噭共樣，各儕有一定个上工時間，自家知幾時愛做麼个事情，大自然實在還妙，全安排到好勢好勢。

毋過這下有盡多人，全盡毋知頭天，也毋曉得愛惜自家个身體，不但日時頭無認真做事、無認真讀書，還搞到三更無半夜毋睡目，後生愛認真打拚，還愛有留糧貯錢个好習慣，到老咧、毋會做事咧，正還有錢好過日仔，再者，自家身體顧好來，較砸磳兜仔，就較毋會傷風感冒、發病仔，就算正經有毋堵好咧，乜當遽就會好，有長著錢，一站仔無做事、無賺錢，乜毋會影響正常个生活，這就係老人家長透會講个，「後生知好留病糧，老咧毋驚燒抑涼。」一語雙關愛知呀！

燕仔蝠婆雙雙飛，一儕出門一儕歸，你高𠊎低講好來，天寬地闊自然美。人係群體生活个，出門摎人交攞係當正常个，往往有人會為著一息仔細事情，摎好朋友爭到屎出，詏到大胲挷細胲、面紅濟炸，最尾連朋友都做毋成，實在就係無必要个，想想燕仔摎蝠婆个畫面，係仰般个溫馨迷人，值得𫣆俚好好來學習，讓一下、退一步，表面上看起來係退，敢正經係退？

華語

七月夏天實在熱，這天較早吃飽晚餐，就出來外面走一走吹吹風，很自然就走到隔壁鄰居的稻田這邊來，因為這裡寬闊視野好，一定會比較涼爽。

這時已經沒太陽，風吹來確實很涼爽，不過天空上還沒有真的暗下來，有看到很多燕子，在那飛上飛下覓食熱鬧滾滾，有時候會飛到走廊來，有時候又會飛到電線上去，吱吱喳喳像在那講話一樣，實在是很有趣。

邊看邊想，這些燕子那麼多又飛得那麼快，很擔心不知道會撞機？突然間發現到，天上較高的位置，飛行的方式還有身材的比例，看起來不像是燕子的樣子，就很認真的看清楚一點，喔～原來是蝙蝠啦，剛好在這傍晚時間，蝙蝠也開始出來覓食了，燕子也趕在天黑前趕快吃飽，才會有這陣子的重疊時間，天黑以後，燕子就會在電線上，站一整排一起休息，不然就真的會撞機了！就像天亮雞啼、天黑蛤蟆叫一樣，各自有一定的上工時間，自己知道幾時要做什麼事情，大自然實在很奧妙，都安排到好好的。

不過現在有很多人，都很不懂事，也不知道愛惜自己的身體，不但白天沒認真工作、沒認真上學，還玩到三更無半夜不睡覺，年輕要認真打拚，還要有存糧儲蓄的好習慣，到老了、不會工作了，才還有錢可以過日子，再者，自己身體要顧好來，強壯一點，就較不會風寒感冒、生病，就算真的發生了，也很快就會好，有存了錢，一陣子沒工作、沒賺錢，也不會影響正常的生活，這就是老人家常常會說的，「年輕知道存病糧，老了不怕熱或涼。」一語雙關要知道呀！

燕子蝙蝠雙雙飛，一個出門一個歸，你高我低講好來，天寬地闊自然美。人是群體生活的，出門和人相處是很正常的，往往有人會為了一點小事情，和好朋友發生爭執，爭到臉紅脖子粗，最後連朋友都做不成，實在是沒有必要的，想想燕子和蝙蝠的畫面，是多麼的溫馨迷人，值得我們好好來學習，讓一下、退一步，表面上看起來是退，真的是退嗎？