我參加過的客家活動

亻厓 參加過个客家活動

 (我參加過的客家活動)

102年全國語文競賽客語演講賽國中組演講稿

各位評判先生，各位同學，大家好！亻厓今晡日要演講个題目係「亻厓 參加過个客家活動」，「亻厓 參加過个客家活動」！

自從客委會成立以來，辦理當多个客家活動，當多人就有參加客家活動个經驗，有人參加桐花祭，有人參加義民祭典，也有人參加六堆客家運動會，亻厓  摎大家共樣，也參加過當多个客家活動，這下，亻厓 就拿其中三擺亻厓 參加過个客家活動向大家來報告：

第一：亻厓 參加南港社區大學辦个：「用客語朗讀環保知識比賽」

舊年暑假，南港社區大學舉辦「用客語朗讀環保知識比賽」，佢个目的，就係希望大家一方面學習客語，一方面學到做環保个方法，提高客家文化个價值，亻厓 有報名參加，因為分數有達到80分以上，故所得到獎學金500元，亻厓 毋單淨當歡喜，又學到摎環保有關係个客家諺語，像係：

有時省一口，冇時有一斗。

勤儉才有底，浪費不成家。

爛衫好遮羞，爛鼓好救，爛銅鑼可嚇賊。

有油莫點雙盞火，免得毋油打暗摸…等等。

亻厓 認為，像這種做得提高客家文化價值的活動，愛多多來辦。

第二：亻厓 參加台灣廣播電台辦个：「唱客家歌比賽」

台灣廣播公司每年都有舉辦：「唱客家歌比賽」，因為亻厓 認為客家歌盡好聽，歌詞又有教育个價值，故所，亻厓 就當煞猛練習唱客家歌，當亻厓 唱到「客家真情」：「…永永遠遠都係和藹可親，以愛關心人…將亻恩 一切个真情，獻分社會所有个人…」个時節，當亻厓 唱到「客家本色」：「…正正當當做一个良善个人，就像亻恩 个老祖先…」个時節，亻厓 心肝肚就想，亻厓 一定愛做一个善良个人，為天下老百姓來服務，故所，亻厓 投入感情上台唱歌比賽，得到優勝獎，分亻厓 當有信心。亻厓 認為，客家歌盡有教育價值，應該愛多多來辦「唱客家歌比賽」。

第三：亻厓 參加寶島客家電台辦个：「客語講古比賽」

為了愛通過客語中高級認證，亻厓 愛練習講標準个客語，故所，亻厓 就報名參加寶島客家電台辦个：「客語講古比賽」，比賽个日，看到恁多來參加比賽个朋友，亻厓 盡緊張，毋過，阿姆教亻厓 放鬆心情，將台下个聽眾當作係自家个老弟老妹，就毋會緊張！正經有影，亻厓 當順利講完「獎券摎擔竿个故事」，毋單淨毋會緊張，還做得得到大家个掌聲，拿到優勝獎，亻厓 十分歡喜，亻厓 認為，像這種做得傳承客家語言个活動，應該愛時時來辦。

客家活動越來越多，每種活動都有佢个價值，毋過，亻厓 認為亻厓 參加過个三種客家活動，做得提高客家文化價值，又做得教人做人做事个道理，還做得傳承客家話，故所，希望大家摎亻厓 共下來參加這兜客家活動，分客家文化流傳千年､萬年､萬萬年。

亻厓 的演講講完了，祝福大家順順利利吃2百2，轉去買田又買地，恁仔細，正來尞，再會。