客家大戲《銅鑼響起時》7月登場　巡演8縣市追念吳湯興精神

客家委員會今年用苗栗銅鑼仕紳吳湯興个事蹟，同榮興客家採茶劇團合作推出全新製作「2026精緻客家大戲《銅鑼響起時》」，今晡（17）日在臺北西門紅樓舉辦宣傳記者會。客委會主任委員古秀妃期盼藉由戲劇追念1895年客家同各族群先烈對臺灣个付出同守護，還過邀請民眾來看戲，重新認識這段臺灣客家歷史。

客委會主任委員古秀妃表示，欣賞這齣大戲有兩隻重點，首先係透過故事內容，了解客家先民个歷史同精神；再來係欣賞戲曲本身个曲調、曲牌、身段同表演藝術。透過兩者个結合，正做得完整感受客家傳統戲曲个特色同魅力。古秀妃也提著，面對當前區域安全情勢、共軍擾台還有短影音這兜新興傳播形式帶來个認知作戰，都提醒𫣆俚愛珍惜民主自由。百過年前先民雖然無現代化武器同充足資源，還係落力守護家園，該種不畏艱難、保鄉衛土个精神，到今還係值得後人深思同學習。

古秀妃也在記者會項贈送「臺灣民主國藍地黃虎旗（摹本）」水晶雕座分吳湯興後人，由吳湯興玄孫吳福基同厥阿姆吳曹雲英代表受贈。這雕座圖像取自國立臺灣博物館典藏國寶个數位修復版本，象徵對先烈精神个追思同敬意。吳曹雲英受訪時節提著，30零年來自從就無放棄尋轉吳湯興个遺骸，到今看著客家大戲《銅鑼響起時》即將在7月登場，巡演8縣市，帶領民眾追念吳湯興精神，實在值得期待。