共下打鬥四

共下打鬥四

本文承蒙邱鴻春老師授權刊登 嘉惠網友 僅此致謝

文／邱鴻春，客語文薪傳師，桃園楊梅伯公岡客家人（海陸腔）

雞啼出門蛤蟆噭正轉屋，這係頭擺耕種人一日个生活，更加莫講，來台祖先開山打林，該斯比這還較艱苦毋知幾多倍（註1）！

避暑期間去參加學校个客語先生考試，在轉个路項，堵好看著割禾機當在該割禾，就停下車來看一下，八十零歲个田頭家阿叔，坐在代步車講，頭擺蒔田割禾全係人工做，上冬時節，通盤做到嘴擘擘仔汗流脈落，想起來強強就會出目汁，這下用機器割當自然咧。

這老阿叔講个，自家做細人還有做著，確實係熱到會死又痎脈脈，愛食著一碗个淨米飯，實在無簡單。面前看著最生趣个係，割禾機脣頭、後背、甚至頭前，有跈跈揫个白鶴摎烏鷯，看佢兜頭探探在該啄食土狗仔、草蜢、𧊅仔……，當驚佢兜一下無注意著，會分割禾機輪著（註2），好得做盡手腳當遽，車一來黏時就跳走咧。

天頂還有緊飛个燕仔，燕仔斷真係過冬鳥，係飛行个高手，在天頂飛上飛下又遽，從頭到尾全無看佢停下來過，就單淨在天頂直接追食蟲蚩定，實在就還慶，毋知佢兜會悿無？

樹頂、竹尾、抑係電線頂企等尞涼，該看看這看看个阿啾箭，看著哪位有佢个目標，就馬上飛下來，嘴對等田肚个蟲仔觜啊去，完全毋使停下來，實在還valai（註3）還輕鬆，佢个目色摎身手嶄蠻好，定著無近視。

看這四種無共樣个鳥仔，共下在這位討食，毋會冤家泌背，顛倒佢兜做得互相支持，在最適當个時間，發揮自家个專長本等，各各企在最湛个位所，蟲蚩毋管走到哪隻方向，全有負責儕掌等，就像在這位歡喜打鬥四樣仔，相賽食到飽𩜰𩜰仔，還好哪！自家愛知自家个能力，千萬就毋好，山雞想做水鴨，見水就無辦法，又講：打田打地，打毋著手藝，確實無半點淆漦。

這下人，毋使像頭擺人恁艱苦，又愛耕田又愛耕埔，逐日做到兩頭烏。斯愛安分守己，認真做好自家本分，毋好看輕自家，乜毋使欽羨人恁慶，人比人會閼死人，何麼个死苦呢？係有再想愛學第二專長，該係最好、最精儕，但係千萬做毋得「三日打魚，四日晒網」，「上夜想該千條路，天光本本磨豆腐」，該就壞淨淨咧！

註釋

（註1）幾多倍：音gioˋ poi＋；多少倍。

（註2）輪著：音lienˇ doˊ；輾壓到。

（註3）valai：泰雅族語中的「Balay」，意指「真的」或「真正的」，客語借用此詞彙為「很棒」、「很厲害」的意思。

華語

雞啼出門田雞叫才回家，這是以前農夫一天的生活，更不用說，來台祖先開山闢林，那就比這還要辛苦不知道多少倍！

暑假期間去參加學校的客語老師甄試，在回家的路上，剛好看到割稻機正在那邊割稻，就停下車來看一下，八十幾歲的農夫地主叔叔，坐在代步車上說，以前插秧割稻都是靠人工，農忙的時候，全部做到嘴巴開開汗流浹背，想起過去眼淚就會流下來，現在用機器割稻很輕鬆了。

這位老叔叔講的，自己小時候還有親身經歷過，確實是熱的要死又全身癢，要吃到一碗的白米飯，實在不簡單。眼前看到最有趣的是，割稻機旁邊、後面、甚至前面，有跟著很多的白鷺鷥和八哥，看牠們頭低低的在那邊啄食螻蛄、蚱蜢、青蛙……，很怕牠們一下沒注意到，會給割稻機輾壓到，還好全部手腳靈活，車一來馬上就跳走了。

天上還有一直飛翔的燕子，燕子不愧是候鳥，是飛行的高手，在天上飛來飛去又快，從頭到尾都沒看他停下來過，就僅僅在天上直接追食蟲子而以，實在是很厲害，不知道牠們會累嗎？

樹上、竹尾巴、或是電線上站著休息乘涼，那看看這看看的烏秋，看到哪裡有牠的目標，就馬上飛下來，嘴對著田肚的蟲子啄過去，完全不用停下來，實在好棒很輕鬆的樣子，牠的視力和身手非常好，一定沒有近視。

看這四種不一樣的小鳥，一起在這裡找食物，不會爭吵打架，反而是牠們能夠互相支持，在最適當的時間，發揮自家的專長本事，各自站在最棒的位置，小蟲不管跑到哪個方向，都有負責的人看守著，好像在這裡開心的聚餐聊天一樣，大家都飽餐一頓，真好！自己要知道自己的能力，千萬不可以，山雞想做水鴨，遇到水就沒辦法，又說：萬一水災毀了田地，還是損傷不了個人的手藝，確實一點都不假。

現在的人，不用像以前的人那麼辛苦，不僅要做田裡活還要做山上的事，每天都是早出晚歸。只要安分守己，認真做好自己本分，不要看輕自己，也不用羨慕別人很棒，人比人會氣死人，那又何必呢？如果想要學第二專長，那是最好、最聰明的人，但是千萬不可以三天補魚，四天曬網，上半夜有一大推的理想，天亮了還是什麼也沒做，那就完蛋了！